لبـنان
أسف بيروت ...
ما قدرتش أمد الأيد ليكي
الجوع كممني وخلاني
كل التواريخ سقطت مني
كل الأحداث صبحت ضدي
مابقتش أفكر غير فيّا
أخواتي ف قلب جبال لبنان
القلب خلاص مبقاش بيدق
وما تستنوش حتى أستنكار
كل الأخبار بتقول عنكوا
شايف أبطالكوا وشهدائكوا
لكن وحياة اللي ما بينّا
لو كنت ح دين ...
برده ح ادينكو ...!
بشوية قمح ونص دولار
راح نقلب كل الحق ضلال
والطفل اللي أتحول أشلاء
راح أقول ..
كان ماسك نووي وكان
على وسطه حزام
وف أيده صاروخ
وعايزها دمار ..!!
بشوية قمح ونص دولار
راح أبيع الدم اللي ما بينّا
من غير مزادات ..
وح أبيع النيل وجبال عرفات
م أنا لسه يا دوب
بايعك يا فرات .!!
والأقصى اللي بينزف أحزان
أنا بايعه كمان
ورضيت بالذل تمن وبديل
ازاي بقى أحزن على قانا
ومزارع شبعا وبنت جبيل
وازاي راح أعيد أمجاد حطين
ما أقدرتش أخلف من تاني
عمرو بن العاص وصلاح الدين
أخواتي ف قلب جبال لبنان
أنا ميت ..
من سبعة وسبعين
ليست هناك تعليقات:
إرسال تعليق